لا حول ولا قوة إلا بالله! هادشي كيخلع و كيحيّر فالصراحة
.باش الجمهور يوصل لهاد الدرجة ديال الكراهية للمدرب ديالو، لدرجة يقولو ليه "وخا تربح كاع الماتشات، بغيناك غير تمشي"... هادي عمرني شفتها فشي بلاصة! هادي كتر من قضية نتائج ولا طريقة لعب، هادي ولات قضية شخصية.
القصة باينة ماشي قصة ديال النتائج، حيت هوما براسهم قالو "حتى لو تفوز". يعني المشكل كبر من التيران. يمكن طريقة اللعب ديالو ما عاجباهومش بتاتا، يمكن الاختيارات ديالو ديال اللعابة، يمكن التصريحات ديالو... الله أعلم. ولكن لي باين هو أن "الدم ما دازش" بينو و بين الجمهور الأردني من اللول. صافي، حكمو عليه و سالاو.
حنا جمال السلامي كنعرفوه مزيان فالمغرب، عندو ما يقول فالكرة و فالتكتيك، و ربح ألقاب. ولكن مرات كيكون عندو شي خرجات و لا شي اختيارات كيخليو الجمهور يتنيرڤا. ولكن باش توصل لهاد الدرجة ديال "اللقب ديالنا هو الطرد ديالك"، هادي قاصحة بزاف و صعيبة على أي مدرب يسمعها.
موقف لا يحسد عليه الصراحة. الكرة ملي كيدخل فيها الشخصي و كتولي بهاد الحدة، كتولي خايبة. الله يدير ليه شي تاويل ديال الخير.